Mapaspasamak ti overloading wenno panangilugan kadagiti pasahero a nalablabes ngem ti naituding a sitting capacity ti maysa a jeep kadagiti terminals iti siudad ti Baguio ken probinsia ti Benguet.
Iti interview ti Bombo Radyo kenni Wilson Bumay-et Jr., Jeepney Federation President- Baguio Benguet, kinunana a naimatanganna a mismo daytoy iti panagrikusda kadagiti nagduduma a terminal.
Gapu iti dayta, impakaasina kadagiti “barker” a kitaenda a nalaing ti bilang dagiti agluglugan a saan a lumabes ken ipangpangrunada ti kinatalged dagiti pasahero.
Impakaasina pay kadagitoy a rumbeng a balanse ti bilang iti agsinnumbangir a tugawan ti jeep tapno komportable dagitoy a nakatugaw.
Kabayatanna, nagpalagip ni Bumay-et kadagiti amin a drayber, operators, ken barkers nga agtulnog iti pagalagadan tapno maliklikan ti multa wenno pannusa.
