Binallaagan dagiti otoridad ti amin nga Overseas Filipino Workers pakairaman dagiti residente sadiay pagilian a Jordan a saan a rumuar dagitoy iti pagtaengan wenno babbalay dagitoy.
Iti interview ti Bombo Radyo Radyo kenni Emily Villanueva, Bombo International News Correspondent idiay Jordan, mabalballakadan dagitoy nga agbalin nga “alerto”, saan nga agturong kadagiti mall ken dadduma pay a pagpasyaran kasta met ti pannakaitantan ti panag-outing dagitoy.
Nabagaan pay ni Villanueva karaman dagiti padana a Pilipino sadiay Jordan nga agurnong ti abasto wenno suplay ti makan tapno apaman a kumaro ti tension ket adda ti mausar dagitoy.
Sigun pay kenni Villanueva, adda ti group chat dagitoy karaman dagiti dadaulo ti Overseas Workers Welfare Administration ken Embassy ti Pilipinas a mangipapakaamo ti posible a mapasamak sadiay.
Iti agdama, agtultuloy latta ti panagtigged dagiti amin a mangmangged gaputa saan a kinanselar ti dadaulo iti nasao a pagilian ti aniaman a kita ti trabaho.
Kabayatanna, nu pay man inaklon ni Villanueva a madandanagan daytoy iti mapaspasamak a tension, impasigurado met dagiti otoridad ti Jordan ti kinatalged dagiti amin a residente gaputa kanayun a nakaalerto ti military forces ti Jordan ti posible a pannakairaman dagitoy iti tension ti Israel ken Iran.
