Kidkiddawen ti Volunteers Against Crime and Corruption (VACC) a maisayangkat ti imbestigasion seknan iti maatap a diversion ti P1.2 billion a pondo ti Bureau of Fire Protection (BFP).
Gapu iti dayta, inawagan ni Volunteers Against Crime and Corruption (VACC) Chairman Arsenio Evangelista ti Commission on Audit (COA) a mangisayangkatda iti independent probe.
Sigun kenni Evangelista, imbestigaran ti Commission on Audit dagiti report seknan iti pondo ti BFP a naipaay iti 911 emergency response program ti Department of the Interior and Local Government (DILG).
Nairanta ti nasao a pundo ti BFP para iti panaggatang kadagiti fire truck, ambulance, rescue vehicles ken personnel training.
Maatap a naggapu ti nasao a kuarta iti Special Account ti BFP, manipud iti nationwide fire safety inspection fees.
Maibasar iti pagannurotan, 80 percent iti koleksion, ket legal a nairanta para iti fire and rescue operations, agraman ti panaggatang kadagiti life-saving equipment.
Inyunay-unay ni Evangelista a rumbeng a sungbatan daytoy dagiti maduktalan a responsable iti maatap nga illegal funds transfer.
Iti kanito a pudno ti fund diversion, impeksa ti nasao nga opisial a rumbeng a paneknekan daytoy ti saanna nga innaganan a whistleblower babaen ti umno a dokumentasion.
