BAGUIO CITY – Pakabuklan a P1.3 billion ti gatadna nga iligal a droga ti nakumpiskar ken ginasgasut a drug personalities ti natiliw iti Cordillera kas maibasar iti datus ti Philippine Drug Enforcement Agency (PDEA) – manipud Enero agingga Nobyembre iti agdama a tawen.
Iti interview ti Bombo Radyo Baguio, kinuna ni PDEA-CAR Regional Director Gil Castro, napintas ti accomplishment ti ahensiya nupay makuna a dakdakkel ti gatad dagiti nakumpiskar nga iligal a droga idi napan a tawen a dumanon iti P1.8 billion.
Dinakamatna pay a nangato ti 86% a conviction rate iti rehiyon gaputa ginasgasut a drug personalities ti napilaan ti kaso.
Sigun pay kenkuana, P80 billion ti gatadna nga ebidensiya ti dinadaelda idi bulan ti Hunyo ken adda pay ti P90 billion nga ebidensiya ti naituding a dadaelenda.
Impettengna a sakbay ti operasyonda ket makikoordinarda pay iti kameng ti National Prosecution, media outfits ken barangay kas witness tapno adda ti transparency.
Agtalek ni Castro a ti panagtulnog ti PDEA-Cordillera iti linteg ti maibilang a best practices dagitoy.
