BAGUIO CITY — Dumanon iti agarup P1.5-M ti gatad dagiti natakaw a produkto iti maysa nga appliance store ken iti maysa a pawnshop sadiay Km. 3, Marcos Highway, Baguio City.
Immuna a naireport iti pulisya ti panangserrek dagiti agtatakaw iti maysa pawnshop iti nasao a lugar ngem iti panagrespondeda ket naamuan a nairaman a natakawan ti kaabay daytoy nga appliance store.
Naduktalan iti imbestigasyon a dinadael dagiti suspek ti padlock ti kayo a ridaw ti bakante a kwarto iti nagbaetan ti pawnshop ken ti appliance store ken idi nakastrekda ket pwersado a dinadaelda t diding ti filling cabinet ti pawnshop ken inalada ti agarup P7,000 iti cash drawer ken maysa a cellphone.
Ginandat dagiti suspek a dadaelen ti vault ti pawnshop ngem saanda a nagballigi.
Kalpasanna, nagsublida iti bakante a kwarto ken insarunuda a dinadael ti partition wall ti appliance store ken inalada ti P140,000 manipud iti cash box, P3,000 manipud iti vault, 25 a unit ti nagduduma a brand ti laptop nga aggatad amin ti nasurok P706,000 manipud iti stock room ken iti sangwanan ti appliance store, 47 pidaso ti cellular phone nga aggatad amin ti P609,610, maysa a nginginaen a relo nga aggatad ti agarup P6,000 ken ti paltog ti gwardiay a caliber 38 nga aggatad ti P18,000 ken dagiti dummy display a cellphones.
Aggatad amin dagiti natakaw a banag iti agarup P1.5-M bayat a narekober dagiti pulis ti maysa a paris ti acetylene hose ken maysa nga oxygen tank iti uneg ti bakante a kwarto.
Manarimaan metten ti imbestigasyon nga isaysayangkat dagiti pulis iti nasao a kaso.
