BAGUIO CITY – Dumanon iti P1.8 billion ti pondo a nasken a gun-oden wenno kolektaren ti lokal a gobyerno ti siudad ti Baguio para iti entero a 2018.
Iti panakiyuman ti Bombo Radyo kenni City Treasurer Alex Cabarrubias, kinunana a naibasar ti nasao a gatad iti 2018 city annual budget.
Impanamnamana met nga aramidenda ti amin tapnu maragpat ti nasao a puntirya wenno gatad ken daytoy ket babaen iti tulong dagiti taxpayers ken dagiti dadduma a resources ti siudad.
Naamuan a nangatngato ti puntiryada ita a tawen no idilig iti agarup P1.6 billion a puntiryada idi napalabas a 2017.
Naituding met a maamuan inton Pebrero 28 no naragpat ti siudad ti puntirya daytoy idi napalabas a tawen.
Sigun kenni Cabarrubias, kaaduan a buis ket manamnama nga agtaud iti sektor ti real property a sarunuen dagiti nagosyo nga adda iti Philippine Economic Zone Authority.
Dinakamatna pay nga iti buis manipud iti real properties ket adda ti mailatang para iti special education fund, iti city government ken iti barangay government.
