Naragsak nga inwaragawag ni Department of Budget and Management Secretary Amenah “Mina” F. Pangandaman nga inaprobaran ken pinirmaannan ti panakaipaluspos ti agarup maysa a bilyon a pisos a pondo para iti panakaipasdek, panakapalawa, ken panakapasayaat ti proyekto a “water, sanitation, ken hygiene” wenno “WaSH” facilities kadagiti kualipikado a local government units iti intero a pagilian.
Sigun kenni Pangandaman, ti nasao nga alokasyon ket maala manipud iti Local Government Support Fund – Support and Assistance Fund to Participatory Budgeting iti sidong ti 2024 General Appropriations Act.
Inlawlawag pay ni Pangandaman a sakop ti nasao nga “WaSH” program dagiti 75 a benepisyaryo ti municipal local government units iti intero a pagilian a karaman iti “4th” agingga iti “6th” income municipal classes.
Patien ni Pangandaman a babaen iti daytoy ket mapapartak ken nalaklakanto ti pananggun-od iti natalged ken umdas a suplay ti danum ken serbisyo iti sanitasyon kadagiti maud-udi a munisipalidad iti pagilian.
Kinuna ni Pangandaman a ti WaSH program ket maitunos iti Joint Memorandum Circular No.1 ti Budget department ken interior department para iti koordinasyon ken panakaipinal dagiti umno a proyekto a maipaayan iti pondo.
Inyunay-unay pay ni Pangandaman a ti napartak a panakaipaluspos ti nasao a pondo ket maitunos iti pammilin ni President Bongbong Marcos a rumbeng a maipatalged ti umdas a suplay ti danum para kadagiti amin a pilipino.//Bombo Alfred Pudsoc