BAGUIO CITY – Maipaayan iti P1 million a gunguna ti asinoman a makaipaay ti impormasyon para iti dagus a panakakemmeg dagiti responsable iti panakapabettak ti dua a granada kabayatan ti pestibidad ti La Paz, Abra.
Inwaragawag daytoy ni Abra Representative Joseph Sto. Niño “JB” Bernos idi kalman, tallo nga aldaw kalpasan ti insidente a nakatayan ti dua a pulis ken nakadangran ti 25 a dadduma pay.
Sigun kenkuana, kasapulan a makemmeg a sibibiag dagiti suspek tapnu maamuan no anya iti kangrunaan a motibo dagitoy.
Kinunana a maibasar iti inisyal nga imbestigasyon dagiti pulis ket mapapati a dua nga indibidual ti nag-ipurwak iti dua a granada iti mismo a nakaurnongan dagiti tattao.
Nupay kasta, agtalek daytoy a personal attack ti napasamak kontra kenkuana ken iti pamilya Bernos gapu iti panagbalin daytoy a nalatak a kongresista iti probinsia ti Abra.
Maipalagip a karaman kadagiti nadangdan ni Rep. Bernos ken ti asawana a ni La Paz Mayor Menchie Bernos.
