BAGUIO CITY – Namingsan manen a kiniddaw dagiti taxi drivers iti lokalidad iti pannakaipangato ti pamasahe kasaruno iti agtultuloy a panagngato ti presyo ti produkto a petrolyo.
Iti interview ti Bombo Radyo Baguio ken James Bolinao, maysa a taxi driver ken presidente ti DUMPER Philippines-Cordillera Chapter, nangipaimadan ti petisyon iti lokal a konseho ti Baguio City para iti kiddawda a pannakaipangato ti pamasahe.
Kinunana a nakalanad iti petisyon dagitoy iti saan a pannakacalibrate ti metro dagiti taxi ken maipangato ti provisional fare iti 10 agingga 15 pesos.
Inlawlawagna nga iti konseho ti nangitedanda iti petisyon dagitoy gapu ta mamatida a makatulong ti lokal a gobierno kadakuada tapnu aprobaran ti Land Transportation Franchising and regulatory board
Dinakamat ni Bolinao nga umno laeng ti pannakaipangato ti plete iti taxi gapu iti agtultuloy a panagngato ti presio dagiti produkto a petrolio.
Kagiddan iti dayta, imbinsana nga addan dagiti padana a taxi drivers a nangisardeng nga agbyahe ken sinumrek kadagiti dadduma a trabaho a kas iti konstruksyon ken dadduma pay.
