BAGUIO CITY – Tinubngar ti general manager ti maysa a kooperatiba dagiti mannalon iti Benguet ti diaya dagiti sumagmamano a lokal a gobyerno ken non-government organizations (NGOs) a gatangenda iti P10 ti tunggal kilo dagiti nateng dagiti mannalon iti Benguet, Ifugao ken Mountain Province wenno saan ket dawatenda dagitoy a libre.
Iti panakiyuman ti Bombo Radyo, kinuna ni Agot Balanoy a ti P10 ket nababa unay no idilig iti gastos dagiti mannalon iti panagmula dagitoy.
Dinakamatna nga iti karot ket aggasgastos ti maysa a mannalon iti P18-P20 nga adayo a nangatngato no idilig iti nasao a diaya a P10.
Sigun kenkuana, adu dagiti maaw-awatda a mensahe manipud kadagiti lokal a gobyerno sadiay lowland ken dagiti NGOs para iti nasao a diaya ngem ipetpettengda met a ti masurot latta ket ti sistema iti transaksion ti nateng.
Inlawlawagna a kaasi dagiti mannalon no saan a magatang dagiti natengda gaputa naggastos met dagitoy.
Immunan nga inyawis ni Benguet Vice Governor Johnny Waguis ti panangilako dagiti mannalon iti nateng dagitoy iti provincial government ken kadagiti pribado a sektor.
Sungbatna daytoy iti pakaseknan dagiti mannalon ti nateng nga agparparikut iti nababa a presyo dagiti nateng nga agresresulta iti panakaibelleng ti dadduma kadagitoy.
Dinakamat ni Waguis a maidonar kas relief goods dagiti gatangenda a nateng manipud kadagiti mannalon.
Inlawlawagna a ti diayada ket P10 tunggal kilo para kadagiti nateng a saan a magatang iti BAPTC, La Trinidad Vegetable Trading Post ken iti Baguio City Public Market.
