BAGUIO CITY – Agtultuloy a maisaksakad iti lokal a konseho ti Baguio City ti panakaipangato ti entrance fee iti Botanical Garden.
Sigun kenni City Administrator Engineer Bonifacio Dela Peña, naaprubaran iti umuna a panakaibasana iti konseho ti singasing a maipangato ti entrance fee dagiti turista nga agtawen iti sangapulo ket tallo nga agpangato iti P100 ken P25 kadagiti turista nga agtawen iti sangapulo ket dua nga agpababa.
Naisingasing metlaeng a maipangato ti entrance fee dagiti residente nga agtawen iti sangapulo ket tallo nga agpangato bayat a libre kadagiti residente nga agtawen iti sangapulo ket dua nga agpababa
Iti agdama, ti entrance fee dagiti adult iti nasao a parke ket sangapulo a pesos laeng bayat a lima pesos laeng kadagiti ubbing.
Inlawlawag met ni Dela Peña a saan a kabaelan ti P10 nga entrance fee nga isustinir ti kinapintas ti nasao a parke rason a kasapulanda ti kanayonan a pundo tapno ad-adda pay a mapapintas daytoy.
Inlawlawag pay ti opisyal a nu adda man ti masubra a koleksyon iti Botanical Garden ket maaramat iti panakapapintas dagiti dadduma pay a parke iti siyudad ken maaramat kas educational fund.
Gapu iti daytoy, guyguyogoyen ni Dela Peña dagiti umili ken bisita a gundawayanda ti nababa nga entrance fee iti Botanical Garden gaputa posible a ngumaton daytoy kadagiti sumarsaruno nga aldaw.
