BAGUIO CITY – Umdas latta met ti suplay dagiti highland vegetables iti rehiyon Cordillera partikular iti probinsiya ti Benguet iti baet ti nailista a dakkel a danyos iti sektor ti agrikultura gapu iti panagdalos ti bagyo a Carina ken agtultuloy a Habagat.
Maibasar iti kaudian a datus ti Department of Agriculture, P11.93 million ti gatad dagiti nadadael a mula iti rehiyon Cordillera.
Pakabuklan a 24.39 metric tons ti high-value crops manipud iti 129.78 nga ektarya ti plantasyon ti dinadael ti bagyo a Carina.
Bassit met a mula a pagay, mais ken cassava ti naapektaran.
Dumanon iti 402 a mannalon ti naapektaran iti bagyo.
Iti agdama ket agtaltalinaed a nababa ti presyo dagiti dadduma a high-value crops uray idi saan pay a napasaran ti bagyo.
Maibasar iti kaudian a monitoring ti Benguet Agri-Pinoy and Trading Center (BAPTC) as of 10:00 a.m., July 31, ti repolyo ket P1 agingga P13 tunggal kilo bayat a ti wombok ket P5 agingga P15 tunggal kilo.
