BAGUIO CITY – Dinadael dagiti otoridad ti P13.464-M a gatad dagiti puon ti marijuana a pinarut dagitoy sadiay Loccong ken Buscalan iti munisipyo ti Tinglayan, Kalinga idi napalabas a lawas.
Naisayangkat ti marijuana eradication operation iti sidong ti Oplan Green Mayo Bravo a nagpaut iti tallo nga aldaw idi May 26-28, 2021.
Nadiskobre dagiti iligal a mula manipud iti uppat a marijuana plantation sites nga addaan kalawa a 6,900 square meters.
Dumanon iti 67,320 a fully grown marijuana plants ti pinarut ken inuram dagiti otoridad.
Nupay kasta, awan ti natiliw a marijuana cultivator.
Iti baet daytoy, impasigurado ni PCol. Davy Vicente Limmong, dadaulo ti Kalinga PPO a saan a sumardeng dagiti otoridad iti kampanya kontra iti iligal a droga agingga a saan a sumuko wenno matiliw dagiti agimulmula ti marijuana cultivators, dagiti mangsupsuplay kadagiti agmulmula ti marijuana ken dagiti agilaklako ti marijuana.
