BAGUIO CITY – Dinadael ti nagtipon a pwersa Kalinga Provincial Police Office ken PDEA-Cordillera ti rinibribo a pidaso ti marijuana plants nga aggatad ti P13.96-M sadiay Bugnay, Tinglayan, Kalinga.
Resulta daytoy ti tallo nga aldaw nga implementasyon ti OPLAN 17 Quebec Jolly Green a nangrugi idi Biyernes ken nagleppas idi kalman.
Nadiskobre dagiti iligal a mula iti innem a plantation sites nga addaan kalawa a 4,000 square meters.
Dumanon met iti 68,800 a fully-grown marijuana plants ti pinarut ken inuram dagiti operatiba.
Nupay kasta, awan ti marijuana cultivator a nakemmeg iti nasao nga operasyon.
Kabayatanna, kinumpiskar dagiti operatiba ti PDEA-Mountain Province ti 17 a pidaso ti marijuana bricks nga aggatad ti nasurok P2-M a naikabil iti maysa a karton a nasarakan iti maysa a waiting shed sadiay Samoki, Bontoc, Mountain Province kahapon.
Iti report ti PDEA-Cordillera, nabayag nga inur-uray dagiti operatiba no adda ti mangala iti nasao a karton agingga a linuktanda daytoy ken sadiay a nadiskobre dagiti linaonna a marijuana bricks.
Gapu iti daytoy, im-imbestigaran ita ti PDEA ti posibilidad ti ‘drop-pick up’ scheme kas baro a modus iti panangiruar kadagiti marijuana manipud iti rehiyon ita a panawen ti pandemya gapu iti nalimitaran a panaggaraw dagiti tao ken panagbiyahe.
