BAGUIO CITY – Pinarut ken dinadael dagiti otoridad ti dumanon P13-M a gatad dagiti fully- grown marijuana plants iti Barangay Butbut Proper ken Barangay Buscalan sadiay Tinglayan, Kalinga idi Biyernes ken Sabado.
Resulta daytoy ti dua nga aldaw a marijuana eradication nga insayangkat dagiti otoridad iti baet ti saan a nasayaat a sasaaden ti panawen ditoy rehion Cordillera.
Naparut ti agarup nasurok 29, 900 a pidaso ti fully-grown marijuana plants manipud iti pito a plantation sites sadiay Barangay Butbut Proper iti umuna nga aldaw ti operasyon.
Naparut met ti agarup nasurok 24, 300 a pidaso ti fully-grown marijuana plants ken nadadael ti 20,000 a gramo ti marijuana stalks manipud iti innem a plantation sites sadiay Barangay Buscalan.
Nupay kasta, awan ti cultivator a nakemmeg bayat ti operasyon.
Impatungpal ti nagtitipon a pwersa ti PDEA-Cordillera, Tinglayan Municipal Police Station ken ti Kalinga Provincial Police Office ti nasao nga operasyon a naawagan ti “Oplan Non Buds”.
