BAGUIO CITY – Dumanon iti P140, 000 a cash ti intaray dagiti tallo a saan pay a nabigbig a babbaket manipud iti maysa nga empleado ti gobyerno ditoy siudad ti Baguio idi kanikadua.
Ti biktima ket agtawen iti limapulo ket walo bayat a dagiti suspek ket tallo a babbaket a mapattapatta nga agtawen iti uppat a pulo agingga iti limapulo.
Maibasar iti report ti pulisya, kabayatan ti pannagna ti biktima iti Abanao Extension ket sinabat daytoy ti maysa kadagiti suspek a nagpammarang a masikog a nangibaga a kasapulanna ti dakkel a kwarta tapnu iparegreg ti sikog daytoy.
Dita nga immasideg pay ti maysa kadagiti suspek a nagsaludsod nu sadino ti ospital iti sentro ti siudad sakbay a simmangpet ti maysa pay a suspek a nangipakita kadagiti alahas a segun kadagitoy ket aggatad iti P300, 000 ngem ilakoda iti biktima iti gatad a P140, 000.
Naay-ayo ti biktima isut gapuna a nag-withdraw iti P40, 000 sakbay a nagturongda iti balay dagitoy ken sadiay nga inyawatna ti kanayunan a P140, 000 kadagiti suspek.
Nupay kasta, idi nagturong ti biktima ken anak daytoy iti pawnshop tapnu ilako dagiti alahas ket naduktalanda a bogus dagitoy isut gapuna a nagreklamoda a dagus iti kuerpo ti pulisya.
Karaman kadagiti peke nga alahas ti tallo a pidaso ti gold necklace, dua a bracelet, ken lima a diamond rings.
Gapu iti daytoy ket nagpalagip manen ti Baguio City Police Office iti publiko iti panagridam ken panagannad dagitoy ken saanda a basta agtalek lattan kadagiti saanda nga am-ammo a tattao.
