BAGUIO CITY – Tuttutukan ita ti Department of Labor and Employment (DOLE)-Cordillera ti panangipalusposda ti pondo para iti COVID-19 Adjustment Measures Program wenno CAMP 2 ken Tulong Panghanapbuhay sa Ating Disadvantaged/Displaced Workers wenno TUPAD Program.
Sigun kenni DOLE-Cordillera regional director Exequiel Ronie Guzman, P147-M ti nailatang para iti implementasyon ti CAMP 2 ken TUPAD Program ditoy Cordillera Region manipud iti Bayanihan 2.
Kinunana nga agarup nasurok 29,400 a benipisaryo ti manamnama nga agnumar kadagiti nasao a tulong, partikular dagiti trabahador manipud iti formal ken informal sectors a naapektaran ti pandemya.
Innayonna nga adda ti kanayonan a P5-M a nailatang para iti TUPAD Program ken dadduma pay a programa a mangited tulong kadagiti informal workers.
Aw-awisenna pay dagiti trabahador kadagiti tourism-related establishments iti panag-access dagitoy iti website a https://reports.dole.gov.ph/ tapnu maamuanda ti proseso iti panagaplikar ken panagawatda ti tulong pinansial.
Kabayatanna, impannakkelna a dumanon iti 5,700 a trabahador ditoy Cordillera nga apektado iti pandemya ti natulonganda babaen iti CAMP 1 ken TUPAD Program.
