BAGUIO CITY – Mapattapatta a dumanon iti P15-M agingga P20-M ti gatad ti nadadael a retaining wall sadiay Leonard Wood Road ditoy siudad ti Baguio.
Sigun kenni City Administrator Engr. Bonifacio Dela Peña, ti panagreggay ti retaining wall iti nasao a kalsada ti kadakkelan a dadael iti imprastraktura a nailista iti siudad ita a panagtutudo.
Kinunana a limmukneng ti daga iti sirok ti retaining wall a rason ti panakargaay ti nasao nga imprastraktura.
Maibasar iti datos ti City Disaster Risk Reduction Management Office, nasurok iti P97-M ti nagbalin a danyos iti sector ti imprastraktura iti siudad a bukbuklen ti nasurok P80-M kadagiti parapubliko nga imprastraktura ken nasurok P17-M kadagiti pribado nga imprastraktura.
Maipalagip a nargaay ti retaining wall iti paset ti Leonard Wood Road idi July 28 a nangitunda metlaeng iti panakapukaw ti suplay ti kuryente gapu iti panaka-apektar ti sumagmamano a poste ti kuryente.
