BAGUIO CITY – Inaprobaran ti lokal a konseho ti Baguio City ti P150-M nga emergency fund para iti COVID-19 pandemic.
Sigun kenni Vice Mayor Faustino Olowan, nagkaykaysa nga inaprobaran ti konseho ti masao a supplemental budget tapnu adda ti maaramat a pangsupusop iti pondo ti lokal a gobyerno a maar-aramat iti manarimaan a health emergency.
Kinunana a maaramat ti pondo iti aniaman a panggep a makita ti lokal a gobyerno a makatulong iti siudad iti daytoy a sitwasyon.
Innayonna a maisumitir metlaeng iti city council ti listaan dagiti gastos para iti panangaprobar ken panangrepaso dagiti mammanday linteg sakbay ti panakaipaluspos ti pondo tapnu maipanamnama nga agtunos dagiti plano ken programa a paka-aramatan daytoy.
Sigun pay iti bise mayor, nakasaganan ti pondo ken agserbi nga standby fund para iti kampanya ti siudad tapnu malabanan ti agdama a krisis gapu iti COVID-19.
Immunan a kinuna ni Mayor Benjamin Magalong nga agarup P18-M agingga P20-M ti binulan a magastos ti siudad kabayatan ti manarimaan nga enhanced community quarantine.
