BAGUIO CITY – Nakumpiskar ti pakabuklan a P158,000 a gatad dagiti iligal a droga iti panagrebbekda iti pagnanaedan ti maysa a high-value individual ken Regional Target Drug Personality sadiay Upper Malvar, Trancoville, Baguio City idi kanikadua.
Naisayangkat ti operasyon iti bileg ti search warrant nga impaulog ni Hon. Maria Ligaya Itliong-Rivera kontra kenni Victor Vladimir Reyes.
Nakumpiskar iti silid ni Reyes ti 10 a pakete ti maatap a shabu nga agdagsen ti agarup nasurok 10 a gramo nga aggatad ti mapattapatta a P68,000; maysa a marijuana brick nga agdagsen ti agarup nasurok 750 a gramo nga aggatad ti P90,000 ken nagduduma a drug paraphernalia.
Naisayangkat ti operasyon gapu iti serye ti reklamo a naawat ti pulisya ken ti opisina ni Mayor Benjamin Magalong seknan kadagiti illegal drug activities ni Reyes.
Nupay kasta, saan a nadanunan dagiti otoridad ni Reyes idi naisayangkat ti operasyon.
