BAGUIO CITY – Nangilatang ti Department of Agriculture ti P165-M a pondo para iti Community-based Swine Production, Repopulation ken Expansion iti Cordillera.
Babaen daytoy ti Farm Clustering and Consolidation ti Integrated National Swine Production Initiatives For Recovery and Expansion (INSPIRE) Program.
Maibasar iti waragawag ti DA CAR, maibingay ti nasao a pondo iti innem a probinsia iti rehion tapno matulongan ti tallo-pulo a swine clusters.
Malaksid iti daytoy, dumanon iti P5.5-M ti pakabuklan nga intervention a maipaay iti tunggal asosasion wenno kooperatiba dagiti mannalon.
Gapu iti daytoy, guyguyogoyen ti Livestock Division ti DA-Cordillera dagiti kooperatiba ken asosasion dagiti mannalon a mangisubmitirdan iti project proposal dagitoy.
Sigun iti ahensia, panggep ti programa a mapaado ti populasion ti baboy ken mapasayaat ti industriya ti panagtaraken ti baboy.
Mamati ti DA-Cordillera a matulongan nga agrekober ti nasao a sektor ken makapataud pay ti rehion ti umdas a suplay ti karne ti baboy.
