BAGUIO CITY – Dumanon iti P17.4-M ti gatad dagiti marijuana a pinarut ken inuram dagiti pulis ken anti-narcotics agents sadiay Tinglayan, Kalinga.
Resulta daytoy ti tallo nga aldaw nga Oplan Five Fingers Saga kadagiti kabambantayan ti Barangay Buscalan ken Barangay Loccong sadiay munisipyo ti Tinglayan.
Sigun iti Cordillera PNP, nadadael ti pakabuklan nga 847,000 a fully grown marijuana plants ken 13,000 a marijuana seedlings nga aggatad amin iti P17,480,000 kas maibasar iti Dangerous Drug Board.
Nadiskubre dagiti maipawil a mula manipud kadagiti 15 a marijuana plantation sites ken sadiay metlaeng a nauram dagiti marijuana.
Agtultuloy met ti panagbiruk dagiti operatiba kadagiti posible pay a marijuana plantations nangruna kadagiti kasulinekan a lugar sadiay Kalinga tapnu maupay dagiti cultivators manipud iti panagmula dagitoy iti marijuana.
Maisaysayangkat met ti nainget a beripikasyon tapnu mabigbig dagiti cultivators dagiti nasao a pagmulaan ti marijuana tapnu maipilan ti kaskenan a kaso kontra kadagitoy.
