BAGUIO CITY–Dumanon iti P17 million a gatad ti marijuana ti pinarut ken dinadael dagiti nagtitipon a panakabagi ti linteg iti maysa nga aldaw a marijuana eradication operation dagitoy iti Barangay Buscalan ken Barangay Loccong sadiay Tinglayan, Kalinga.
Maibasar iti report, naparut dagiti nasao a marijuana iti 15 a marijuana plantation sites babaen kadagiti soldado ti 50th Infantry Battalion; dagiti operatiba ti Philippine Drug Enforcement Agency – Cagayan ken Cordillera ken dagiti pulis ti Tinglayan PNP.
Dinayaw met ni Major Geneneral Perfecto Rimando Jr., commander ti 5th Infantry Division dagiti nasao a panakabagi ti linteg gapu iti panagballigi dagitoy iti nasao nga anti-marijuana operation.
Dinakamatna a mismo a dagiti rebelde a komunista ti mangminminitinir ken agilaklako kadagiti marijuana kas maysa a pagtataudan ti pondo dagitoy.
Innayonna nga iti kaawan dagiti dadakkel a negosyo ken pagminasan a pagalaan dagiti rebelde iti pondo ket ti panagilako ti marijuana ti nagbalin a maysa kadagiti negosyo dagitoy.
Maipalagip nga idi napalabas a Hulyo ti 2017, ket nakarekober dagiti soldado iti sumagmamano a kilo ti marijuana kalpasan a sinanebda ti maysa a kampo dagiti rebelde sadiay Dango, Tinoc, Ifugao.
