Pinarut ken inuram dagiti otoridad ti P2.42-M a gatad dagiti pinuon ti marijuana iti insayangkatda nga anti-illegal drug operation iti tallo a nagsisina a disso iti nagbeddengan ti Sugpon, Ilocos Sur ken Kibungan, Benguet.
Nadiskobre ti 8,100 a pidaso dagiti fully-grown marijuana plants ken 10,000 a pidaso dagiti marijuana seedlings iti tallo a pagmulaan nga addaan kalawa a mapattapatta 1,220 square meters.
Sigun kadagiti otoridad, agtultuloy ti panangwanawada iti nasao a lugar kalpasan a nakaawatda ti impormasyon manipud kadagiti mismo nga umili seknan kadagiti nasao a kontrabando.
Nupay kasta, awan ti naaktuwan ken nakemmeg a marijuana cultivator iti naisayangkat nga operasyon.
Iti agdama, iggem ti Regional Drug Enforcement Unit – Region 1 dagiti sample a marijuana plants para iti kaskenan a disposisyon. (via Bombo Radyo Vigan)
