BAGUIO CITY – Im-imbestigaran ita ti pulisya ti maatap a panakahold-up ti tallo a lallaki a naka-alaan ti P2.7-M a gatad ti kwarta a para kuma kadagiti benipisaryo ti Pantawid Pamilyang Pilipino Program ti Tinoc, Ifugao idi parbangon kalman.
Nabigbig dagiti biktima a da Marlon Guimangad, 26-anyos; Chester Guazon, 33-anyos; ken ni Jeffrey Buhyag, 29-anyos, bin-ig a residente ti Kiangan, Ifugao bayat a saan pay a nabigbig dagiti tallo a suspek.
Sigun iti Ifugao PNP, personal a nagturong iti istasyon ti Kiangan PNP ti tallo a biktima tapnu ireport ti napasamak a panakahold-up dagitoy iti kurbada a kalsada sadiay Awa, Julongan, Kiangan, Ifugao idi alas dos dies idi parbangon.
Maibasar iti inisyal nga imbestigasyon, nagtaud dagiti tallo iti Lagawe Multipurpose Development Cooperative idi rabii ken nagbiaheda paturong sadiay Tinoc, Ifugao ken iggem ni Chester Guazon ti bagpack a naglaon iti nasao a gatad ti kwarta.
Naglugan da Guazon ken Buhyag iti maysa a motorsiklo bayat a naglugan met ni Guimangad iti maysa pay a motorsiklo.
Nangun-una iti kalsada ni Guimangad ken idi makadtengda iti Sitio Awa ket sadiay a pinasardeng dagitoy dagiti tallo a suspek nga armado kadagiti paltog ken indeklarada ti hold-up.
Inala dagiti suspek a nakasuot iti nangisit a mask ken dark colored a pantalon ken shirts ti bagpack manipud kenni Guazon sakbay dagitoy a timmaray paturong iti Julongan, Kiangan, Ifugao.