BAGUIO CITY – Mangilatang ti lokal a gobyerno ti Baguio iti P20-M a pondo para iti panakanayon dagiti kama iti Baguio City Community Isolation Unit (BCCIU) iti sigud a Santo Niño Hospital ken iti panakatarimaan dagiti silid sadiay a nadadael kabayatan ti habagat iti napalpalabas a lawas.
Sigun kenni Mayor Benjamin Magalong, sakupen ti pondo ti panakagatang ti 150 a kama tapnu maipangato ti kapasidad ti nasao nga isolation facility.
Kinunana a mainayon pay ditoy ti panakaisimpa dagiti nadadael a silid a naapektaran idi napasaran ti napigsa ken nabayag a panagtudtudo gapu iti nepnep.
Imbinglayna nga adda ti naawatna a report nga adda ti panagtedted ti danum kadagiti tawa ken pader a nangbasa iti kama kadagiti sumagmamano a kwarto iti nasao a pasilidad.
Mangnamnama pay ni Mayor Magalong a makompleto ti panakagatang dagiti 150 a kama ken ti panakatarimaan dagiti naapektaran a silid iti uneg ti makabulan.
