BAGUIO CITY – Nakaala ti lokal a gobyerno ti Baguio iti P200-M a grant manipud iti opisina ni Presidente Rodrigo Duterte para iti panakaipasdek ti integrated command center ti siudad.
Sigun kenni Mayor Benjamin Magalong, ti nasao a command system ket addaan ti closed-circuit television (CCTV) system ken maaramatan ti artificial intelligence.
Mangnamnama daytoy a maala ti siudad ti pondo sakbay nga agleppas ti agdama a tawen tapnu marugian metten ti kontruksion iti pasdek.
Dinakamatna nga uppat a bulan ti kasapulan para iti panakaipasdek ti command center sadiay compound ti City Engineering Office.
Innayon ti mayor a sakupen ti integrated command center ti traffic management, disaster response ken ti seguridad ti entero a siudad.
Impannakkelna pay a no matungpal ti plano ket daytoyen ti kaunaan a kita ti integrated command center iti entero a pagilian.
