BAGUIO CITY – Pakabuklan a P21.6-M a gatad dagiti marijuana ti pinarut ken inuram ti nagtipon a pwersa dagiti anti-narcotic operatives ti PDEA-Cordillera ken Police Regional Office Cordillera iti tallo nga aldaw nga eradication operation kadagiti kabambantayan ti Loccong, Tinglayan, Kalinga.
Sigun kenni PDEA-Cordillera regional director Gil Castro, nadiskobre dagiti iligal a mula iti tallo a pagmulaan nga aglawa iti 12,000 metro kwadrado idi July 7-9.
Nagresulta ti operasyon iti panakadadael ti 107,500 fully-grown marijuana plants ken 2,500 marijuana seedlings.
Naisayangkat ti operasyon kas paset ti nairtengan a kampanya ti goberyno kontra iti iligal a droga.
Inkari met ti pulisya nga uray awan ti nakemmegda a cultivator kabayatan ti operasyon ket ituloyda latta ti panagsawarda kadagiti bantay sadiay tapnu maisardengen ti panagmula ken ti suplay ti maiparit a mula.
