BAGUIO CITY – Nairtengan pay ti kampania ti Optical Media Board (OMB) kontra iti pannakailako dagiti peke wenno napirata a DVDs.
Intunda daytoy ti panangkumpiskar ti OMB iti agarup 150 a sako ti pirated DVDs nga aggatad ti mapattapatta a P21-M ditoy siudad ti Baguio.
Sigun kenni Atty. Anselmo Adriano, chairman ti OMB, babaen iti nasao a kampanya ket masalwadan ti intellectual property rights dagiti pelikula, musika ken dagiti software.
Impanamnamana a makasuan ken sumango iti pannusa dagiti akinkukua kadagiti nakumpiskar a pirated DVDs ken dagiti agtultuloy nga agilaklako kadagiti nasao a kontrabando.
Inlawlawag ti OMB a nasken a mangala iti permiso kadakuada dagiti negosiante nga aglaklako kadagiti DVDs.
Inlawlawag daytoy ti ahensia kasaruno ti reklamo dagiti negosyante a nakumpiskaran kadagiti pirated DVDs.
Kinuwestionaran dagiti negosyante ti pannakakumpiskar dagiti tagilakoda iti baet nga addaanda met iti permiso.
Sigun kenni Atty. Adriano, nasken a mangala pay iti permiso wenno clearance manipud iti OMB dagiti negosyante nga agilako ti DVDs sakbay dagitoy a mangala ti permiso manipud iti lokal a gobyerno.
