BAGUIO CITY – Naipaayan ti lokal a gobierno ti syudad ti Baguio iti P255-million a pondo manipod iti Department of Human Settlements and Urban Development (DHSUD) a maaramat para iti socialized housing project.
![](https://img.bomboradyo.com/baguio/2020/11/baguio-city-hall-3.jpg)
Sigun ken City Planning and Development Coordinator Dona Tabangin, sakupen ti pondo ti pannakaipatakder dagiti istraktura iti 1.8-hectare a lote a tagikua ti syudad.
Kinunana a mabaelan ti syudad a mangipatakder iti walo nga istraktura a makaakomodar iti 270 socialized-housing units nga asideg manipod iti road networks, addaan iti bio-filtration plants ken solar panels iti bubong ti istraktura babaen iti nasao a pondo.
Inlawlawagna a 40 a porsiento laeng ti lote iti maaramat a pakaimuntaran dagiti istraktura bayat a ti nabatbati a 60 a porsiento ket mailatang para iti green spaces tapnu tumulong iti rehabilitasion iti aglawlaw ti Baguio City.
Ti Baguio City ti kaunaan a lokal a gobierno a nakagun-od iti nasao a pondo manipud iti DHSUD.