BAGUIO CITY – Dumanon iti P3.1-million a gatad ti marijuana plants ti dinadael ti Police Regional Office Cordillera ken lima a drug personalities ti nakemmeg iti makalawas nga anti-drug operations dagitoy idi Abril 1 agingga Abril 7.
Maibasar iti datus, nakemmeg dagiti drug personalities kalpasan ti panakadiskobre ti pakabuklan a 4.47 grams ti maatap a shabu a mapatta-patta nga agbalor ti P30,396 kadagiti nagsina nga operasyon iti probinsiya ti Abra, Benguet ken ditoy siudad ti Baguio.
Uppat kadagiti suspek ket nailista kas high-value individuals bayat a ti maysa ket street-level individual.
Amin dagitoy ket sumangsango iti kaso a panaglabsing iti Republic Act 9165 wenno Comprehensive Dangerous Drugs Act of 2002.
Kabayatanna, iti marijuana eradication operations, nadiskobre ti uppat a plantation sadiay Barangay Tacadang, Kibungan ken Baragay Kayapa, Bakun.
Dumanon iti 3,675 a pidaso ti fully grown marijuana plants ken 20,000 grams iti dried marijuana stalks ken fruiting tops nga agbalor iti P3,135,000 ti nadiskobre ti Benguet Police Provincial Office.
Manarimaan met ti imbestigasyon dagiti otoridad para iti panakakemmeg dagiti cultivator ti nasao a mula ken tapno ad-adda a madadael ti daduma pay a plantation sites iti probinsiya.
