BAGUIO CITY- Agtultuloy ti nainget a kampanya ti Police Regional Office Cordillera (PROCOR) ken Department of Environment and Natural Resources – Cordillera kontra iti iligal a panagpukan ti kayo kadagiti kabambantayan ti rehion.
Sigun iti Cordillera PNP, manipud 2017 agingga ita iti umuna a kwarter ti agdama a tawen ket nakaisayangkatda iti 187 a pakabuklan nga operasyon kontra iti iligal a panagpukan ti kayo.
Nangitunda dagitoy iti panakatiliw dagiti 60 nga illegal loggers, panakakumpiskar ti P3.2-M a gatad dagiti illegal lumbers, panaka-impound ti 28 a lugan, panakakumpiskar ti 10 a chainsaw ken panakaipila ti 25 a kaso kontra kadagiti illegal loggers.
Nailista iti probinsia ti Benguet ti kaaduan a bilang dagiti narekober a kayo a sinaruno ti Apayao, Mt. Province, siudad ti Baguio, Kalinga, Ifugao ken Abra.
Kagiddan iti naaramidan ti rehion iti kampanya kontra iti iligal a panagpukan ti kayo, impanamnama ti dadaulo ti Cordillera PNP ti agtultuloy a panangsuportar ti pulisya iti DENR iti nainget nga implementastyon ti anti-illegal logging campaign ti gobyerno tapnu maipreserba dagiti nabatbati a kabambantayan iti rehion Cordillera.
