BAGUIO CITY- Pakabuklan a P3.62 million a gatad ti marijuana plants ti nadiskubre ken dinadael dagiti autoridad sadiay Kalinga ken Benguet manipud Hulyo 19 agingga idi kalman.
Karaman ditoy ti 10,000 pinuon ti dadakkel a marijuana plants nga aggatad iti dua a milyon a pisos a nadiskubre sadiay Buscalan, Tingalayan, Kalinga.
Nadiskubre met sadiay sitio Lengyatan, Kayapa, Bakun, Benguet ti 2,100 a pinuon ti dadakkel a marijuana nga aggatad iti P420-K.
Kagiddan iti daytoy, nadiskubre met sadiay Sitio Dalipey, Tacadang, Kibungan, Benguet ti sangapulo a kilos ti dried marijuana stalks nga aggatad iti P1.2-M.
Dagiti nasao a kontrabando ket inuram dagiti autoridad kadagiti nasao met laeng a disso.
Awan met ti nakemmeg nga indibidual kadagiti nasao nga operasyon nga impatungpal dagiti nagduduma a unit ti pulisya ken PDEA.
