Dumanon iti Php31.6 billion a pondo ti inlatang ti European Union (EU) para iti Green Economy Program iti pagilian a Pilipinas a pakairamanan ti panangkissay iti basura ken kasta met iti renewable energy ken research.
Sigun kenni Massimo Santoro, European Union Ambassador, inlawlawagna a manipud iti nasao a gatad ket Php3.6 billion ti immunan a nailatang ti European Union para iti Green Economy bayat a manamnama a manayunan daytoy manipud kadagiti sumagmamano nga estado a kameng iti Europian Union ken financial institutions a mangipaay iti agarup Php28 billion iti sidong ti “Team Europe” approach.
Inyunay-nayna a daytoy ket paset iti Global Gateway Strategy iti European Union a mangitandudo iti “smart, clean, and secure connections” iti benneg ti digital, energy, ken transport sectors ken kasta met iti pannakapabileg pay iti health, education ken research systems iti intero a sangalubungan.
Iti sidong ti Green Economy, sumagmamano kadagiti proyekto iti Siudad ti Baguio ti binisita ti grupo a pakairamanan ti manarimaan nga experimentation iti Black Soldier Fly Facility para iti pannakaiproseso dagiti biodegradable waste usar iti maysa a klase iti ngilaw sadiay Irisan Eco Park, ken kasta met iti Smart City Command and Control Center sadiay Baguio Convention Center.
Malaksid kadagitoy, binisitada met laeng ti manarimaan a dua pay a proyekto iti European Union iti siudad ken iti Cordillera a pakairamanan iti proyekto a panggep na a suportaran ti tarigagay iti gobierno a mangrisut iti nakaro a wagas iti Child Labor kas iti online sexual abuse wenno exploitation iti ubbing ken pannakalabsing iti acceptable working conditions; ken iti maysa pay a proyekto a mangsupsuportar iti Philippine Justice sector babaen iti Justice Zone, a maysa kadagiti na-establisiar ditoy Baguio City.//Bombo Genzel Depayso
