BAGUIO CITY – Nakemmeg ti dua a turista gapu iti panagimet ken panangibiaheda iti P4.44-M a gatad ti marijuana sadiay Kalinga idi kanikadua.
Nabigbig dagitoy a da Jose San Juan Raymundo Jr., 20-anyos, baro ken Kian Cortez, 22-anyos, naasawaan, agpada a residente ti Quezon City.
Sigun kadagiti otoridad, nakaawatda iti tawag seknan iti panangimet ken panangibiahe dagiti dua iti marijuana ken nakalugan dagitoy iti parapasahero a bus manipud Tinglayan, Kalinga paturong sadiay Tabuk City, Kalinga.
Dagus met a nangisayangkat dagiti otoridad iti mobile checkpoint ken sadiay a pinarada ti nasao a bus.
Nakita dagiti dua ti nasao a checkpoint ken ginandatda a naglibas ngem nadiskobre dagitoy dagiti pulis.
Nakumpiskar kadagiti nakemmeg a turista ti 37 a pidaso ti marijuana bricks ken marijuana tubular forms.
Inaklon met ni Cortez ti panangibiaheda kenni Raymundo kadagiti nasao a marijuana ngem nagkedked daytoy a mangibutaktak iti kinasiasino ti gimmatangan wenno iti pangitedanda iti kontrabando.
Naisayangkat ti operasyon babaen iti nagtipon a pwersa dagiti units ti Philippine Drug Enforcement Agency – Cordillera ken Police Regional Office Cordillera.
Paset daytoy ti kampanya dagiti panakabagi ti linteg tapnu malapdan ti iseserrek dagiti iligal a droga partikular ti marijuana iti masakupan dagitoy.
Pagyamyamanan metlaeng dagiti otoridad ti tulong dagiti maseknan nga umili iti panakaparmek ti iligal a droga iti rehiyon.
