BAGUIO CITY – Saan nga inawat ti Baguio Flower Festival Foundation Incorporated (BFFFI) ti ti P4-M a subsidiya nga ipapaay ti lokal a gobyerno ti Baguio para iti panakarambak ti tinawen a Baguio Flower Festival wenno Panagbenga.
Sigun kenni Frederico Alquiros, co-chairman ti BFFFI, umdasen ti P18-M a pondo dagitoy para iti panakaipatungpal ti festibidad inton sumaruno a tawen 2020.
Inwaragawagna daytoy kalpasan a kinumpirmar ti lokal a gobyerno ti siudad a ti BFFFI ti mangimaton iti Panagbenga 2020.
Sigun kenni Mayor Benjamin Magalong, saanda a makibiang iti panakaimaton ti Panagbenga 2020 gaputa naan-anay nga impaimadan ti resposibilidad iti BFFFI.
Agtalek daytoy iti abilidad ti BFFFI kalpasan nga imparang ti grupo ti master plan para iti panakaisayangkat ti tinawen a festibidad.
Nupay kasta, impanamnama ni Mayor Magalong ti kinasagana ti lokal a gobierno a tumulong iti kanito nga adda ti tumaod a parikot wenno pakaseknan kabayatan ti nasurok makabulan a pasken.
Addaan ti 25th Baguio Flower Festival iti tema a “Blooming through the years”.
Mangrugi ti festival babaen iti opening parade a pakaitampokan ti lyre and drum competition inton February 1, 2020.
Maisayangkat met ti nagduduma nga aktibidad iti uneg ti makabulan ken agleppas dagitoy babaen iti grand street dancing parade inton February 29 ken iti grand flower float parade inton March 1 malaksid pay iti closing ceremonies ken fireworks display inton March 8.
Mapadaanan iti Panagbenga 2020 dagiti traditional activities kas iti landscaping exhibition and competition, school-based landscaping competition, alumni homecoming ti Philippine Military Academy, Handog ng Panagbenga sa Pamilya Baguio, Let a Thousand Flowers Bloom, kite flying competition, cultural shows, flower tee golf tournament, sponsors day, ti makalawas a Session Road in Bloom ken ti Baguio Blooms Exposition.
