BAGUIO CITY – An-anopen ken ibirbiripikar ita dagiti otoridad ti pakabigbigan ti kustomer a nanggandat a mangipatulod paruar iti Kalinga iti uppat a marijuana bricks a nailemmeng iti maysa a box babaen iti branch sadiay Tabuk City ti maysa a courier company idi kalman.
Maibasar iti report ti pulisya, nakaawatda iti tawag manipud iti empleyado ti LBC sadiay Bulanao, Tabuk City seknan iti maatap a marijuana brick a linaon ti maysa a package.
Nailanad iti salaysay ti maysa kadagiti staff ti nasao a courier company a linuktanna ti nasao a box nga ipatulod kuma ti sender a nabigbig iti nagan a Daisy Palangdao kas maibasar iti pinirmaan daytoy a sender’s information.
Nakitana ti maysa a brick a nabalkot ti newspaper ken packing tape ken idi inikkatna ti cover ket nakitana ti linaon daytoy a napagango a bulbulong ken puon ti maatap a marijuana.
Dagus met a pimmanaw ti babai a sender idi nadlawna a nadiskobre ti linaon ti box sakbay pay a nakatawag iti pulis dagiti staff ti courier company.
Nadiskobre met dagiti pulis ti uppat a marijuana bricks nga aggatad ti P480,000 iti uneg ti box a liningdan dagiti nagiling a kape.
Naiturong metten dagiti kontrabando iti Kalinga Provincial Crime Lab para iti eksaminasyon.
