BAGUIO CITY – Maisingsingasing ti P5-B development project iti merkado publiko ti Baguio a maaramid babaen iti public-private partnership (PPP) iti nagbaetan ti lokal a gobyerno ti siudad ken ti grupo dagiti market vendors, partikular ti Baguio Market Vendors Multipurpose Cooperative.
Nupay kasta, nasken nga idalan ti kooperatiba ti proposal daytoy iti Swiss Challenge nga isayangkat ti PPP Selection Committee ti siudad.
Maipalagip nga iti agdama ket ur-urayen paylaeng ti komite ti panakaisayangkat ti negotiation process para iti panakabukel dagiti pinal a terms of reference ti market development project.
Nailanad iti proposal ti kooperatiba dagiti market vendors a maibangon ti lima a kadsaaran a merkado iti masakupan ti tallo nga ektarya a lote ti lokal a gobyerno, partikular iti central business district ken magastusan daytoy iti mapattapatta a P4.6-B.
Maaramat met ti P400-M iti panakaisimpa ti singasing a parking building ken temporaryo a relocation site dagiti market vendors a mapukawan ti pwesto kabayatan ti implementasyon ti proyekto.
Isingsingasingda metlaeng ti panakabukel ti management committee a mangimaton iti operasyon ti pasilidad iti las-ud ti 20 a tawen a lease period.
Inlanad pay ti kooperatiba iti proposal daytoy a nasurok 4,000 market vendors ti maakomodar iti pasdek malaksid iti panaka-aramid ti agarup 1,900 a parking slots.
