BAGUIO CITY – Inaprobaranen ti lokal a konseho ti Baguio ti pondo a P5-M para iti panaka-aramid dagiti stalls wenno pwesto a pakaiyakaran dagiti vendors sadiay Burnham Park.
Naamuan a ti P5-M ket naipaay iti lokal a gobierno ti Baguio manipud iti nasyonal a gobierno a maigatang kuma kadagiti kagawaan para iti kampanya kontra iti COVID-19.
Impanamnama met ni Atty. Rhenan Diwas, dadaulo ti City Environment and Parks Management Office (CEPMO) a maaramid iti kabiitan a panawen dagiti nasao nga istruktura tapnu matulongan metten dagiti nasao a vendors a napukawan ti panggedan.
Dinakamatna a dumanon iti 94 a vendors ti maakomodar dagiti 16 nga stalls ken mabukel ti schedule iti panaglako dagitoy.
Innayonna nga inaprobaran metten ti tribu ti Ibaloi ti lugar a mapangpanggep a pakaipasdekan dagiti stalls partikular iti nagbaetan ti Children’s Park ken ti Ibaloi Garden kalpasan ti serye ti taripnong dagitoy.
Nupay inaklon ni Atty. Diwas a kurang ti P5-M a pondo para iti nasao a proyekto, impanamnamana nga ikagumaanda latta nga agala ti pondo a maipaay met kadagiti dadduma pay a vendors sadiay.
