BAGUIO CITY – Pinarut ken inuram dagiti otoridad ti ginasgasut a ribo a puon ti marijuana nga aggatad amin ti P50.3-M iti tallo nga aldaw a marijuana eradication dagitoy sadiay Loccong, Tinglayan, Kalinga.
Sigun iti PDEA-Cordillera, dumanon iti 251,500 a pidaso ti marijuana plants ti pinarut dagiti operatiba manipud iti 18 a plantation sites nga aglawa iti pakabuklan nga 18,300 square meters.
Kinuna ti ahensia a resulta daytoy ti Oplan: Linis Barangay XIII ti PDEA-Cordillera ken Oplan: Green Pearl Delt ti Cordillera PNP a naisayangkat manipud July 23 agingga ita nga aldaw, July 25.
Kagiddan iti daytoy, inkari dagiti otoridad ti agtultuloy nga operasyon tapnu madadael amin a mula a marijuana iti rehiyon Cordillera kas maitunos iti kampanya ti agdama nga administrasyon kontra iti iligal a droga.
