BAGUIO CITY – Nakemmeg ti maysa a high value target drug personality ditoy siudad ti Baguio kalpasan nga inserbi dagiti otoridad ti warrant of arrest daytoy sadiay Upper Session Road, Baguio City.
Nabigbig daytoy a ni Al Denver Wal Sayan, 33-anyos, baro ken residente ti Pico, La Trinidad, Benguet.
Kabayatan ti panangrikisa dagiti otoridad iti personal a kagawaan ni Sayan ket nakadiskobreda iti iligal a droga ken drug paraphernalia.
Nakumpiskar manipud kenni Sayan ti agarup nasurok 7.5 a gramo ti mapapati a shabu ken innem a gramo ti napagango a bulong ti marijuana nga aggatad amin iti P51,720.
Sigun kadagiti otoridad, naipaulog ti warrant of arrest ni Sayan kalpasan a napaay daytoy nga agparang iti korte para iti panakaibasa ti sentensiana iti kasona a panaglabsing iti RA 10591 wenno ti Comprehensive Firearms and Ammunition Regulation Act.
Naamuan nga immuna a nakemmeg ni Sayan idi October 5, 2016 gapu iti panagimetna iti iligal a droga, drug paraphernalia, bala ken maysa a caliber 38 revolver ngem nawayawayaan daytoy kalpasan a nagpiyansa bayat a matingtingiting paylaeng ti kasona iti korte.
