BAGUIO CITY – Nagresulta iti panakakumpiskar ti nagduduma a naragadi a kayo nga addaan pakabuklan a gatad ti P52,000 ti agresibo ken awan sarday a kampanya dagiti pulis iti rehion Cordillera kontra iti iligal a panagpukan ti kayo.
Sigun iti Cordillera PNP, narekober sadiay Lamut, Ifugao ti nagduduma a naragadi a kayo ti tangili, oak tree ken red lawaan nga aggatad amin iti nasurok P32,800.
Narekober met dagiti naragadi a puon ti g-melina nga aggatad ti nasurok P8,000 sadiay Sta. Maria, Alfonso Lista, Ifugao.
Narekober pay dagiti naragadi a pine tree nga aggatad ti nasurok P6, 200 sadiay Antadao, Sagada, Mt. Province bayat a narekober dagiti naragadi a narra nga aggatad ti agarup P5,000 iti igid ti pagnaan sadiay Kabugao, Apayao.
Naipaima met dagiti narekober a kaykayo iti maseknan a CENRO kadagiti nasao a lugar bayat nga imbilin ti dadaulo ti Cordillera PNP ti naing-inget nga intelligence build-up kontra kadagiti illegal loggers tapnu makemmeg ken maibalud dagitoy.
