BAGUIO CITY – Dinadael dagiti anti-narcotic agents ti PDEA-Cordillera ken Cordillera PNP ti dumanon P52-M a gatad dagiti marijuana iti tallo nga aldaw a nagsina nga eradication operations nga insayangkatda kadagiti kabambantayan ti Mountain Province ken Kalinga ita a lawas.
Pinarut dagiti otoridad ti 13,000 a pidaso ti marijuana manipud iti dua a plantation sites sadiay Mt. Ungyod, Betwagan, Sadanga, Mt. Province kas paset ti implementasyonda iti Oplan Teabag.
Pinarut met dagiti otoridad ti 240,500 a pidaso ti marijuana manipud iti siyam a plantation sites sadiay Loccong, Tinglayan, Kalinga kas paset ti Oplan Linis Barangay 12 ti PDEA-Cordillera ken Oplan Green Pearl Charlie ti Cordillera PNP.
Aggatad amin dagiti naparut a marijuana iti P52-M ken amin dagitoy ket nauram iti nakaparutanda a plantation sites.
Kagiddan iti daytoy, inkari dagiti otoridad ti panangituloyda iti nairtengan a kampanya tapnu maparmek ti panagmula ti marijuana ditoy rehiyon Cordillera.
