BAGUIO CITY — Agtaltalinaed ti takder ti transport group a PISTON a ti panangipaay dagiti paggasolinaan iti P6 a diskwento kadagiti parapubliko a lugan ti solusyon iti epekto ti baro a tax reform iti benneg ti sektor ti transportasyon.
Iti panakipatang ti Bombo Radyo kenni Lito Wayas, presidente ti PISTON – Baguio-Benguet, kinunana a napimpintas ti nasao nga addang no ti aksion ti dadduma a grupo a panagkiddawda iti panakaipangato ti plete.
Kinunana nga iresrespetoda met ti karbengan dagiti dadduma a transport group a mangkiddaw iti kanayonan a plete ngem iti benneg ti grupoda ket saanda a kayat a dagiti pasahero wenno konsyumer ti madagsenan gapu iti panagngina dagiti produkto a petrolyo nga itunda ti panakaipangato ti buis dagitoy.
Impettengna a ti kiddawenda ket ti kanayonan a diswento iti gatangenda a petrolyo iti baet nga iti agdama ket adda ti maipapaay a diskwento para kadagiti parapubliko a lugan manipud kadagiti paggasolinaan a nasurok met iti P1.
Kidkiddawenda met iti Duterte Administration ti panakibinnadang daytoy iti transport group para iti panangkiddawda iti nasao a banag kadagiti kompanya ti lana.
Impettengna pay nga uray ited dagiti kompanya ti lana ti kiddawda a P6 a diskwento ket saan dagitoy a malugi gaputa dakkel ti maganganansiada kadagiti produkto a petrolyo.
