BAGUIO CITY – Dinadael dagiti nagtipon a pwersa ti PDEA ken PNP ti P6-M a gatad dagiti marijuana iti impatungpalda a tallo nga aldaw nga eradication operation sadiay Loccong, Tinglayan, Kalinga a nangrugi idi Miyerkoles ken nagleppas idi laeng kalman, aldaw ti Biyernes.
Sigun kenni PCol. Davy Vicente Limmong, dadaulo ti Kalinga Police Provincial Office, nadiskobre dagiti operatiba dagiti 30,000 a dadakkelen a marijuana iti maysa a pagmulaan nga addaan kalawa a 5,000 square meters.
Kinunana a ti operasyon ket implementasyon ti OPLAN 12 Mike Budha Grass ti Cordillera Police ken ti Oplan Linis Barangay ti PDEA.
Nupay kasta, awan ti nadanunan dagiti operatiba a marijuana cultivator iti nasao nga operasyon.
Iti baet daytoy, inkari ni Limmong ti nasustinir nga operasyon dagiti otoridad kontra iti panagmula ti marijuana babaen iti agtultuloy a panangbisitada kadagiti kadawyan a pakaimulmulaan dagiti marijuana ken iti panangdiskobreda kadagiti dadduma pay a nakaimulaan dagiti mairjuana tapnu madalusan amin a barangay sadiay manipud iti iligal a droga.
Kabayatanna, dinadael metlaeng dagiti otoridad ti 24 a pinuon ti marijuana sadiay Luzong, Luba, Abra itay laeng nabiit.
Kinuna ti PDEA-Abra a nakaawatda iti report manipud iti chairman ti Barangay Anti-Drug Abuse Council ti Barangay Luzong, Luba mainaig iti nakita ti residente sadiay a pinuon ti marijuana iti kakaykaywan a paset ti Sitio Patatag.
Dagus a nagresponde dagiti otoridad a nagresulta iti panakaparut dagiti nasao a marijuana ken iti panakauram dagitoy iti nasao metlaeng a disso.
