TUBA, BENGUET – Nakumpiskar ti P7.2 million ti gatadna a marijuana manipud iti 26-anyos a suspek iti buy-bust operation nga impatungpal ti Philippine Drug Enforcement Agency iti waiting shed idiay Camp 4 Kennon Road, Tuba Benguet itay laeng agsapa.
Pakabuklan nga innem a pulo a kilo ti marijuana ti nakumpiskar manipud iti 26-anyos a suspek manipud Kibungan, Benguet.
Maibasar iti imbestigasyon, maysa a PDEA agent idiay Region 4-A ti nakaawat ti impormasyon seknan iti panagsinnarak ti suspek ken ti buyer.
Maibasar pay iti report, ti suspek ket supplier ti high grade marijuana manipud Kibungan, Benguet.
Manamnama a sumango daytoy ti kaso a panaglabsing iti Republic Act 9165.
Naipama metten dagiti nakumpiskar nga iligal a droga iti PNP Crime Laboratory idiay Camp Bado Dangwa.
