Naituding a maaramat ti P8 million a cash prize a naawat ti siudad ti Baguio manipud Philippine Sports Commission (PSC) iti panakapasayaat dagiti sports facilities iti siudad.
Iti panakiuman ti Bombo Radyo kenni Gaudencio Gonzales, Sports &Development Officer-Baguio City, kinunana a ti P5 million a cash prize a naawat iti Batang Pinoy 2023 ken P3 million iti Philippine National Games 2023 ket maaramat iti panakagatang dagiti baro nga equipments dagiti atleta nangruna ket mano a tawenen a maar-aramat dagitoy.
Sigun kenni Gonzales, agaramid dagitoy iti breakdown ti P8 million a cash prize ken daytoy ket maiturong iti City Council para iti panakaabrobarna ken no naaprobaran daytoy ket mabalinen a maaramat ti kwarta.
Iti agdama, iggem ti City Treasury ti nasao a kwarta para iti pakadeposit daytoy gapu ta dagtoy ti mangimanmanehar kadagiti kwarta iti siudad.
Inyunay-unay met ni Gonzales a ti kwarta ket maaramat laeng iti Sports development ken saan a para kadagiti daduma nga opisina.
Iti sabali a bangir, kinuna ni Gonzales a ti cash prize iti panagbalin ti siudad kas maikadua a pwesto iti Batang Pinoy 2024 ket mauray pay laeng nangruna ket ado a proseso ti pagdalanan daytoy.
