BAGUIO CITY – Pinarut ken inuram dagiti anti-illegal drug operatives ti P83.16-M a gatad dagiti marijuana iti tallo nga aldaw a marijuana eradication operation kadagiti kabambantayan ti Tinglayan, Kalinga.
Sigun kenni PCol. Davy Vicente Limmong, direktor ti Kalinga PPO, nadiskobre dagiti nasao a marijuana kadagiti 14 a disso iti nagsina a paset ti Tinglayan.
Immuna a dinadael dagiti operatiba ti mapattapatta nga 11,500 a pidaso dagiti fully-grown marijuana plants nga aggatad ti mapattapatta a P2.3-M manipud iti lima a plantation sites sadiay Barangay Tulgao East.
Simmaruno a dinadael dagiti operatiba ti nasurok 404,300 a pidaso dagiti fully-grown marijuana plants nga aggatad ti P80.86-M manipud iti siyam a plantation sites sadiay Mt. Chumanchil iti Barangay Loccong.
Nupay kasta, awan ti nakemmeg a marijuana cultivators kabayatan ti serye ti operasyon.
Sigun kenni PCol. Limmong, ti kaudian nga operasyon a naisayangkat idi August 17-19, 2020 ket resulta ti nairtengan nga anti-illegal drug efforts dagiti tropa ti gobyerno iti sidong ti OPLAN Mike 13 Juliet Echo ti PRO-Cordillera ken ti Wrecking Marijuana Valley ti PDEA-Cordillera.
Innayonna a paset daytoy ti panangsuportarda iti kampanya ti gobyerno kontra iti iligal a droga kas maitunos iti Anti-Illegal Drugs Campaign Plan Double Barrel ken Barangay Drug Clearing Operations ti pulisya ken PDEA.
