BAGUIO CITY – Kinuwestionaran ti sigud a bise gobernador ti Kalinga ti panangipatungpal ti provincial government iti public consultation para iti P999-M nga utangen ti probinsia iti Land Bank of the Philippines.
Panggep kuma daytoy a mapunduan dagiti nabigbig a development projects a narugian iti napalabas nga administrasyon tapnu mapapartak ti panakakompleto dagitoy.
Nupay kasta, iti waragawag ni James Edduba iti social media, kinuestionna ti panggep a konsultasyon iti nasao a banag agsipud ta nalpasen nga inaprobaran ken rinatipikaran dagiti provincial board members ti panggep a panagutang ti probinsiya.
Iti panakiuman ti Bombo Radyo Baguio, kinunana a sakbay a naaprobaran ti nasao nga addang ket nasken a nakonsulta ken nangngegan nga umuna ti kapanunutan dagiti umili ti Kalinga gaputa dagitoy met ti agnumar iti utangen ti probinsia.
Nupay kasta, atapenna nga adda ti immuna a naangay a konsultasyon iti pribado a talon ti gobernador ti Kalinga.
Kagiddan iti daytoy, kinuwestionaran metlaeng ni Edduba dagiti proyekto a pakaiturungan ti P999-M kas kadagiti kalkalsada ken impettengna a makikita nga adda ti anomalya iti nasao a gatad nga utangen ti provincial government ti Kalinga gaputa nailatang daytoy kadagiti awan kaes-eskanna a proyekto a saan met a pagdur-asan ti probinsia.
Innayonna pay a saan a naplano a nalaing dagiti proyekto a pakaiturungan ti mautang a gatad.
Gapu iti daytoy, angayenda inton bigat, July 16 ti maysa a unity walk tapnu ipeksa ti saanda a panangsuportar iti nasao nga addang ti provincial government ti Kalinga.
