BAGUIO CITY – Puntirya ti Baguio a masustinir ti pababa a bilang dagiti kaso ti COVID-19 a mailislista ti siudad kadagiti napalpalabas a lawas.
Sigun kenni Mayor Benjamin Magalong, maragpat ti nasao a puntirya babaen iti panakamintinir ken panakairteng ti implementasyon dagiti paglintegan kontra iti COVID-19.
Dinakamat met ni City Health Officer Dr. Rowena Galpo a simmayaat ti datus ti siudad iti kaso ti COVID-19 kas maibasar iti two-week growth rate ken iti average daily attack rate.
Maibasar iti rekord, adda itan ti Baguio iti low epidemic risk level kalpasan a nailista ti siudad ti -7% a two-week growth change ken 6.39 percent nga average daily attack rate.
Inlawlawag pay ni Mayor Magalong a makita ti panagbaba iti kaso ti COVID-19 iti siudad iti napartak a panagbaba iti bilang dagiti indibidual a nakaptan ti COVID-19 a naiturong kadagiti ospital ken isolation facilities.
